మహా వెలుగు హైదరాబాద్ 24 : ముఖ్యమంత్రి కేసీఆర్ 80 వేలకు పైగా ఉద్యోగాలు భర్తీ చేయనున్నట్లు అసెంబ్లీలో ప్రకటించారు. అందులో భాగంగా ఈరోజు పలు శాఖల పరిధిలోని 30 వేల ఉద్యోగాల భర్తీకి ఆర్థిక శాఖ అనుతులిచ్చింది.
తెలంగాణలో కొలువుల జాతర మొదలైంది. అసెంబ్లీ సాక్షిగా 80 వేల ఉద్యోగాలు భర్తీ చేయనున్నట్లు ముఖ్యమంత్రి కేసీఆర్ ప్రకటించినట్టుగానే అందుకు సంబంధించిన ఉత్తర్వులు కూడా వెంటవెంటనే వెలువడుతున్నాయి. ఉద్యోగ నోటిఫికేషన్లకు దాదాపు లైన్‌క్లియరైంది. ఉద్యోగాలను భర్తీ చేసేందుకు అనుమతిస్తూ ఆర్థిక శాఖ గ్రీన్ సిగ్నల్ ఇచ్చింది. రాష్ట్రంలో పలు శాఖల్లో ఖాళీగా ఉన్న 30,453 పోస్టులను భర్తీ చేసేందుకు ఆర్థిక శాఖ అనుమతులిచ్చింది.
టీఎస్‌పీఎస్సీ భర్తీ చేయనున్న గ్రూప్ వన్ ఉద్యోగాలతో పాటు పోలీస్, జైళ్లు, రవాణా, వైద్యారోగ్య శాఖల్లోని 30,453 పోస్టుల భర్తీకి అనుమతులు లభించాయి. మిగిలిన శాఖల్లోని ఖాళీ పోస్టులకు సంబంధించి ఆయా శాఖల మంత్రులు, అధికారులు సమీక్షించిన అనంతరం ఆర్థిక శాఖ అనుమతులు ఇవ్వనున్నట్లు తెలుస్తోంది. ఆయా శాఖల్లోని ఖాళీలను బట్టి వేర్వేరు నియామక సంస్థల ద్వారా ఉద్యోగ నియామకాలు చేయనున్నారు. శాఖల వారీగా ఉద్యోగాల భర్తీకి అనుమతిస్తూ ప్రభుత్వం జీవోలు జారీ చేసింది.
గత అసెంబ్లీ బడ్జెట్ సమావేశాల్లో సీఎం కేసీఆర్ భారీగా ఉద్యోగాలు భర్తీ చేయనున్నట్లు ప్రకటించారు. వివిధ శాఖల్లో 80,039 ఖాళీలను భర్తీ చేస్తామని చెప్పారు. కాంట్రాక్ట్ ఉద్యోగులను క్రమబద్దీకరించనున్నట్లు వెల్లడించారు. సీఎం ఆదేశాల మేరకు వివిధ శాఖల్లో ఖాళీగా ఉన్న పోస్టుల భర్తీకి సంబంధించి కీలక ఘట్టం పూర్తయింది. పోస్టుల భర్తీకి ఆర్థిక శాఖ క్లియరెన్స్ లభించింది. ఇక నోటిఫికేషన్లు ఇవ్వడమే తరువాయి.