మహా వెలుగు హైదరాబాద్ ప్రతినిధి 25 : బతుకుదెరువు కోసం ఓ కుటుంబం హైదరాబాద్‌కు వచ్చింది. కూలీనాలీ చేసుకొని బతుకుతున్న ఆ కుటుంబంపై డెంగ్యూ పగబట్టింది. దేవుడా అంటూ ఆస్పత్రికి వెళ్తే.. వైద్యం చేయాల్సిన డాక్టర్లు మోసం చేశారు. మృతదేహానికి వైద్యం చేసి.. బిల్లులు వసూలు చేశారు. దీంతో అసలు విషయం తెలిసి.. బాధితులు లబోదిబోమంటున్నారు.
వైద్యుడిని కనిపించే దేవుడిగా భావిస్తారు. ప్రాణాలు కాపాడాలని కాళ్లావేళ్లా పడతారు. కొందరు డాక్టర్లు ఎంతో శ్రమించి ప్రాణాలు కాపాడి నిజంగా దేవుడిగా నిలుస్తారు. కానీ.. కొందరు వైద్య వృత్తికే మచ్చ తెస్తారు. పేదల కష్టాన్ని కార్పోరేట్ గద్దలకు దోచిపెడతారు. ఆఖరికి డబ్బుల కోసం శవాలకు కూడా వైద్యం చేసేస్థాయికి దిగజారుతున్నారు.
తాజాగా.. హైదరాబాద్ నగరంలో ఠాగూర్ సినిమాలోని సీన్‌ను తలపించే ఘటన వెలుగులోకి వచ్చింది. చనిపోయిన యువతికి వైద్యం చేసిన భాగోతం బట్టబయలు అయ్యింది
హైదరాబాద్‌కు బతుకుదెరువు కోసం వచ్చిన కుటుంబంలోని 21 ఏళ్ల యువతికి ఇటీవల డెంగ్యూ ఫివర్ వచ్చింది. అక్కడాఇక్కడా తిరిగిన నయం కాలేదు. దీంతో ఈనెల 14వ తేదీన ఆ యువతిని ఓ ప్రముఖ ఆస్పత్రికి తీసుకెళ్లారు. అయితే.. అప్పటికే ఆ యువతి చనిపోయింది. కానీ.. సదరు ఆస్పత్రి నిర్వాహకులు మాత్రం 15వ తేదీన కూడా ట్రీట్‌మెంట్ చేశారు. యువతి మృతదేహానికే మందులు వేశారు. రక్తం ఎక్కించారు. పాపం.. చనిపోయిన విషయం తెలియని యువతి తండ్రి.. పొలం అమ్మి మరీ హాస్పిటల్ బిల్లులు చెల్లించాడు.
తీరా బిల్లులు అన్నీ చెల్లించాక.. యువతి చనిపోయిన విషయం చెప్పారు. దీంతో బాధిత కుటుంబం లబోదిబోమని మొత్తుకుంది. ఇప్పటిదాకా బాగుందని చెప్పి.. డబ్బులు కట్టగానే చనిపోయిందని చెబుతారా అని ఆ ఆస్పత్రి సిబ్బందిని ప్రశ్నించారు. వారికి సమాధానం చెప్పేదిపోయి.. ఉల్టా యువతి తల్లిదండ్రులను దబాయించారు. ఇప్పటికే మీకు రూ.50 వేల వరకు తగ్గించామని.. ఇంకా గొడవ చేయడం ఏంటని సదరు ఆస్పత్రి సిబ్బంది బాధితులను బయటకు నెట్టేశారు. ఈ విషయాన్ని తొలివెలుగు రఘు బయట పెట్టాడు.